..تموز.."حكاية العين والمخرز"..من بيصور..1983__ الى عيتا.. 2006

وقفت شجرة الدلب بالوادي
وصارت على طيور الفلا تنادي
حطِّت على أغصانها حومات
ميّة كنار وبلبل وشادي
قالت في عندي خبار وحكايات
وقفات عز ونصر وشهاده
طيرو احملوها وترغلو الكلمات
في كل ضيعه وشارع ونادي
وخلّو الحكايه تصير غنيّات
لحن العصافير بسما بلادي
.
الحكّام ياما طأطأت روسا
من خوفها كلما العدو همَّز
باعت شرفها وضاع ناموسا
وسرقت رغيف الناس والمخبَز
أزلامها عمتحفظ دروسا
مع طائفيّه وبغض تتميَّز
تغلي بحقدا وتشحن نفوسا
ضد الآهل والخي تتجهّز
ولما الغريب بلادنا يدوسا
بتصيح بدنا نعيش يا معزَّز
إيد الما فيك تعضها بوسا
والعين ما بتقاوم المخرز
.
لكن رجال الحق ما راحو
والحق ما بيتكسَّر جناحو
لو تخاذلو الحكام بالأخطار
وتجابنو وخافو وبكو وناحو
بيطلع بقلب الشعب سيّد بار
بيحركو وبيحمل سلاحو
.
بتتذكرو بيصور وقت الاحتلال
كيف العدو عاديارنا تجبَّر
جيشو هجم تيعتقل بعض الرجال
ويذل نخبة شعبنا ويبطَر
وقفت الضيعه وقفة أسود الجبال
وكل الأهالي واجهو العسكر
قالو الشيوخ ولادنا أبطال
بيصور الهُم ما بتتنكَّر
قالو لا تكبر ربنا أكبر
وصخرة جبلنا ما بتتكسَّر
من يومها فجر الإبا تمركز
والنسر طار وللوغى تحفَّز
جرح الكرامه تمرد على السيف
والعين قالت لا.. للمخرز
.
وقفت شجرة الدلب شوفوها
بتحبكم عن جد حبّوها
أغصانها عمترتعش وتميل
بدها تحاكيكم وتحكوها
في عِبها اخبار ميّة جيل
النسمات من كل صوب جابوها
بتحكي وحفيف وراقها تراتيل
أوعى تقولو ما سمعتوها
عمتغني أوف.. يا شمس الآصيل
يا نجوم يا رايات علّوها
بتموز غرّد عالغصن عصفور
أصفر جناحو لامع مطرَّز
جايب رساله من بلابل صور
بتقول فزنا ونصرنا تعزَّز
عين اللي قالت لا.. في بيصور
صارت بعيتا.. تكسر المخرز